nach oben

Planetengott Jupiter

Jupiter

als klassischer Planetenherrscher dieses Donnerstags möge Ihnen wohl gesonnen sein

Planetengott Jupiter

Von dem Jupiter

Vernünfftig / gelehrt / verschwiegen / gerecht /
Also seind all mein Kind vnd Knecht.
Langwirig / trefflich ding treib an /
Mit Kauffmanschafft wol gewinnen kan.

Aus der Astronomia Teutsch
von 1576

Jupiter der ander Planet / von Natur warm und feucht / bezeyychner deß guten vnd rechten gerichts / fridlich / auß den farben des blaw. Auß den tagen den Donnerstag / vnnd nächten Sontags nacht / süß am geschmack. Jupiter stehet nach Saturno aller höchst am Himmel / lauffet 12. Jar vor der Sonnen / erfüllet seinen lauff in 12. Jaren durch den Zodiacum oder 12. Zeychen / ist inn jedem Zeychen ein Jar. Der krebs ist sein erhöhung / darinn er grossen gewalt hat. Der Schütz vnn Fisch seind seine heuser / hat darinnen auch grossen gewalt.

Im Zwilling / Jungkfrawen / vnnd Steinbock hat er keinen gewalt / Er fellt im Steinbock.

Jupiter hat vnder den Bäumen / Eychbaum / Bonen / Zucker / Nüß / Mandeln.

Von den Edelgestein hat er den Smaragd / Saphir / Ametist.

Von den Metallen Zinn.

Von den Thieren / Adler / Hirß / vnnd alle hübsche zame thier / so da nit geneygt seind zu schaden.

den geschmack süß.

Under den landtschafften Hungern / Hispanien / Collen.


In den Stunden Jupiters ist gut /

König krönen / heirat machen / kleyder schneiden vnd anlegen / allerley thier reiten / wandern / säwen / baum pflantzen / bäw anfahen / gut mit Königen / Fürsten / vnnd Geystlichen Herren handlen vnnd reden. Die stund bringt den kauff leuten guten gewinn inn der substantz / gut Gelt anlegen / mit der wechsel handlen / besonder mit silber / gut zu schiff sitzen / aderlassen / frid machen / braune Rossz kauffen / Ist alles gut darinn zu handlen was zur gerechtigkeyt gehört.

Nit gut kauffen / Hüt dich vor fewr. Es ist nicht gut tieffe gruben grawen / vnd in der Erden vmbgehn / nit gut Schaaf vnd andere thier kauffen.


Ein Kind geborn in Jupiters stund /

Wirt vernünfftig vnd weltweise / legt aber seine vernunfft nit wol an / dann er waget leib vnd seel an das zeitlich / kan sich auß falschem hertzen freundtlich gegen den leuten erzeygen / hat ein schön breyt angesicht / ein schlechte nasen / lang haar / ist barmhertzig / hat frawen heimlich lieb / hat fromme leut lieb / hasset böse leut / kan guten rath geben / hat gerechtigkeyt lieb / hat gern wolschmackende ding / ist frölich / thue niemandt nichts zu gut / man bitt jhn dann ernstlich darumb / hat alle seine sachen heymlich / Er bedarff sich wol fürsehen / daß er nicht jähling sterbe. Wanns jhm wolgehet / so hilfft er den leuten.

Diese obberürte eygenschafft wircket Jupiter inn seinen stunden kräfftigklich / so die Sonn in seinen heusern laufft / als im Hornung inn Fischen / im Wintermonat im Schützen. Wann der Mon neuw wirt in seiner stund / ist der halb Monats trucken / das ander theyl fast windig. Jupiter mit sampt dem Mars hat im Menschen innen die lebern / rippen / Darumb hüt dich inn jren stunden / Artznei die leber nicht.