Saturn
als klassischer Planetenherrscher dieses Samstags möge Ihnen wohl gesonnen sein
Von dem Planeten Saturno
Ein Alt / Kalt / Fauler / Wendt den schimpff / Unflätig / hässig / han keinn glimpff. Mein kind feindselig / neidig / herb / Metall / Bley / Eisen / mein gewerb.Saturnus ist der erst vnd oberst Planet / Ein verderber vnnd feind der natur / gifftig von natur / katl vnnd trucken / bezeychner der arbeyt / auß den farben schwartz / sawr an dem geschmack. Auß den tagen den Sambstag / vnnd nächten Dinstags nacht. Er lauffet so hoch am Himmel / daß er in 30. Jaren / 5. tagen vnnd 6. stunden durch die 12. zeychen laufft / ist inn jedem Zeychen dritthalb Jar. Von wegen seiner höhe sihet man jhn selten. Die Wag ist sein erhöhung / darinn er grossen gewalt hat / Der Steinbock vnd Wassermann seine heuser.
Im Krebs vnnd Widder hat er kein glück. Der Widder ist sein fall.
Saturnus ist einer verderbten natur / wie die Sonn einer lebend machenden.
Wann Saturnus so nahe bey der Erden wer als der Mon / so were es allezeit Winter.
Die grösse Saturni ist ein achttheyl der Sonnen.
In den stunden Saturni
ist gut schwere ding kauffen vnnd verkauffen / als Eisen / Bley / vnnd allerley Metall vnnd schwer Ertz / schwere stein / schwartzgewandt / gut Gärten bawen / Weiher grab en / Ertz graben / vnd was in der Erden zuhandlen ist / gut seine feind mit list bekriegen / graw thier reiten / als Esel / Rossz vnnd Maulesel / gut allerley speiß einkauffen / gut sähwen vnd äcker bawen.
In der stund Saturni ist nit gut Artznei nemme / newe kleyder schneiden noch anlegen / haar beschneiden / gehe in kein Schiff / reyse nicht vber feld / such kein feind / mach kein Ehe / wirff oder scheuß niemandt / nit aderlasse / nit schrepffe / Ist nit gut gley fordern noch nemmen / er geneußt sein nicht. Wer in der stund kranck wirt / ligt lang / stirbt zuletzst. Es ist bös mit grossen / besonders Geystlichen Herrn handlen / mit Fischern / Jägern / vnnd freunden / böß anfahen zu bawen maurwerck / nit gut gesellschaft machen / Weiber nemmen / sie leben sonst inn vnliebe.
Ein Kind geborn in Saturnus stund /
Wirt ein träger / schwermütiger Mensch / mit eim dünnen bart / bleycher gelben farb / dick / hart / schwartz haupthaar / Ist hochmütig / fahet viel an / richt nichts recht auß / wil vber andere leut seyn / wirt selten reich / wonet gern bey wassern / Ist von natur diebisch / räubisch / neidisch vnd hässig / er sticht gern / vnglückhafft inn allen seine sachen / hat viel vnreiner hitz / wirdt schnell kranck / zürnet nicht leichtlich / helt lang zorn / seines guts vnmildt / lügenhafft / hat tieffe mörderische augen / ist vngern bey vilen leuten / tregt gern schwartz / grawet bald / ist kein frawen mann / redet gern mit jm selbst / ist wol beredt / sihet gern vndersich.
So die Sonnen im Christmon inn Steinbock / oder im Jenner inn Wasserman laufft / ist Saturnus viel kräftiger inn seinen stunden dann zu anderer zeit.
Item / so der Mon new wirt in Saturnus stund / derselbige Monat wirt fast kalt / vnd das mehrer theyl feucht.
Saturnus hat am Menschen innen das miltz / darumb so artzney das miltz nit / so es in Saturnus stundt ist. Das recht ohr / vnd blasen / frawen vnnd manns besitzt er auch / vnnd zum theyl Phlegma.